الدليل الكامل لشراء الأثاث من دمياط .. خريطة المعارض المهمة

الأثاث من دمياط

كتبت : إلهام الجمال

مهر وشقة وعفش .. اساسيات محددة متعارف عليها لاتمام الزواج .. هانسيب الشقة على جنب .. والمهر مالناش دعوة بيه .. ونيجي للعفش !

المهمة التقيلة على قلب العروسين !

فاختيار اثاث منزل الزوجية الجديد بالشكل اللي يتماشى مع امنيات العروسة وميزانية العريس مهمة تكاد تكون مستحيلة ..

ومعقولية السعر وجودة الخامات وجمال الذوق اطراف معادلة يسعى العروسين لتحقيقها .. عشان كده بتكون مدينة دمياط هي الملاذ الوحيد الأمن..

لأنها اشتهرت من زمان وعلى مستوى العالم أجمع بجودة الاثاث فيها..

مع قدوم فصل الصيف اللى بيعد موسم للتزاوج، بيزور دمياط الكتير من المقبلين على الزواج لاختيار عفش عش الزوجية.

وباعتبارى زوجة لدمياطي، مقيمة في المحافظة الساحلية من خمس سنوات تقريبا .. قررت أن اهدي كل عروسين خبرتي اللي اكتسبتها بالمعايشة والمراقبة والاحتكاك..

 

احذر السماسرة

– مدينة دمياط بينها وبين القاهرة ثلاث ساعات .. مده طويلة نسبيا ممكن تخلي كتير يكسلوا يدبوا المشوار عشان يختاروا عفش بيتهم الجديد ..

لكن صدقوني تلات ساعات سفر متعبة، افضل بكتير من سنين ندم بعد كده .. عشان اللى هاتلاقيه في دمياط، صعب تلاقيه في حتة تانية

ولو لقيته هايكون بسعر مضاعف ..

-لو كنت جاى مواصلات وركبت اى وسيلة قطر أو عربية أو حتى أتوبيس، اوعى تجيب سيرة انك نازل تشترى عفش ..

اى وسيلة مواصلات دمياطية ملغمة بالسماسرة اللى ممكن يبعتوك حرفيا مقابل عمولة محترمة..

-نفس السماسرة اللى في المواصلات ممكن تقابلهم في الشارع لو جيت البلد بعربيتك، ووقفت سالت اى حد عن معارض الاثاث

حتى لو وقفت تسأل ست، هاتلاقى السمسار طالع من تحت الارض وراشق في الحوار وابقى قابلني لو عرفت تخلع.

_الحل الامثل انك ماتسألش .. وتيجى بناءا على اتفاق بينك وبين أحد الأصدقاء أو الأقارب من أهل المدينة ..

ولو مافيش يبقى تعالى لوحدك الاول ولف في البلد على راحتك اتعرف على اماكن البيع والشراء وبعدين هات العيلة والعروسة وتعالى.

– المرافق الأهم في الرحلة دي مش العروسة ابسليوتلى .. المرافق الأهم هو النجار ..

فحضرتك كده لازم تتفق مع نجار ثقة وابن حلال وفاهم في انواع الخشب وتفاصيل التشطيب، عشان يعاين الاثاث اللى هاتختاره قبل ماتدفع.

 

نصائح مبدئية

– كل اللي عليك قبل السفر هو تحديد الميزانية المقرر صرفها .. وتحديد اللي محتاجة بالظبط ونوعيته ..

يعنى بالبلدي كده تبقى عارف انت عايز كام أوضة، ومودرن ولا كلاسيك، وفي حدود كام ..

لأنك لو جيت وقلت أقرر لما اتفرج واشوف، مستحيل هاتقدر تاخد قرار، لأن المعروض كله مغري.

 

–  لما تدخل المعرض اوعى انبهارك بالفنش الظاهر ينسيك انك تتأكد من جودة الأساس المستخبي ..

أغلب المعارض بتهتم بجودة التشطيب الخارجى على حساب نوعية الخشب وتفاصيل الصنعة .. وعشان تتفادى ده قدامك حلين ..

ياتسال مجرب سبقك وتعامل مع مكان ثقة وبضاعته عاشت معاه، والاماكن اللي ذي دى كتير في دمياط وسمعتها سبقتها..

أو تخطف رجلك لشارع عبدالرحمن مع رفيقك النجار وتجيب الاثاث كله خشب ابيض وتشطب انت بمعرفتك بقى ..

الموضوع ممكن يكون مرهق لكن اضمن واوفر.

– لو هاتشترى من معرض شغل جاهز، مايغركش تقل الخشب يعنى ماتشتريش بالكيلو .. تقل ضلفة الدولاب مثلا مش دليل على أن الخشب ممتاز زى مابيقول بعض الفتايين.

– لو بتشترى انتريه أو صالون أو حتى ركنة، عاين القماش كويس واتاكد أنه عملى لا هايوبر بالاستخدام ولا ينتش ولا ينحل ولا يحرر..

جودة الاسفنج وكثافته مهمة كمان عشان ماتلاقيش نفسك قاعد على الخشب بعد شهر العسل.

– وانت بتشترى الدولاب والسرير والسفرة ركز في التفاصيل الصغيرة وسيبك من الشكل الخارجي ..

عاين الارفف والعوارض الداخلية والملة كويس اووى

بعض المعارض الجيدة

عن تجربة اهل الخبرة في التعامل مع المعارض المختلفة جيبتلك اهم المعارض اللى ممكن تزروها..
“معرض ابو سمره” : تشطيب متوسط خشب متين اسعار معقوله اذواق متوسطه فيها بعض الحجات الحلوه ..
“معرض ارو و زان” : اذواق راقيه اسعار عالية تشطيب و خشب نضيف ..
ولعشاق الكلاسيك اكيد “معرض البدري” هاتلاقوا فيه اللى يناسبكم بس اسعار عالية لكن شغله نضيف جدا تشطيب و خشب ..
معرض “مودرن فيو مودرن” اسعار معقولة، تشطيب حلو و خشب نضيف ..

ولو نويت تشترى خشب ابيض وتشطب انت، فيه زي ما قلتلك شارع عبدالرحمن لو ميزانيتك محدودة ..

لكن لو معاك فلوس يبقى معارض “اسماعيل العقاد” هناك هاتلاقي خشب زي الفل تشتريه وانت مغمض.

وفيه كمان معارض “الجلاد” لكن اسعارها عاليا وتشطيبهم فوق الممتاز خشب متين كلاسيك
“بينوكيو” مودرن اسعار عاليا جدا وتشطيب راقي لكن اذواق و مقاسات محدوده جدا ..
معرض “حامد البسيوني” شكل حلو اسعار معقوله خشب متوسط.

وفي النهاية ونصيحة شخصية قبل ماتدفع لازم تفاصل .. فاصل .. وفاصل .. فاصـل .. وربنا يتمم بخير.

اقتراحات اضافية للشراء من القاهرة

اذا كنت من سكان القاهرة، فانت لست مضطر للسفر الى دمياط، وتحمل تكلفة النقل الكبيرة، اضافة الى مجهود البحث.

القاهرة اليوم فيها عدد من معارض الأثاث الرائعة بأسعار أقل من أسعار دمياط، وجودة مشروطة بالضمان لسنوات أيضا.

أهم هذه المعارض هي معارض قباني للأثاث التي تبدأ فيها أسعار غرفة النوم فيه من 14 ألف جنيه مصري الى 41 ألف جنيه.

ويبدأ سعر الصالون فيه من 10 آلاف الى 32 ألف جنيه مصري.

أما أسعار الركنات في قباني تبدأ من 7 آلاف جنيه الى 13 ألف جنيه.

ومزايا قباني عن أية معارض آخرى هو أنه يقدم خدمات الشحن والتركيب مجانا، اضافة الى ضمان عام على أي قطعة أثاث.

فيخفف عن عاتق المشتري كثير من التفاصيل والمخاوف.

ثاني أهم معرض أثاث في القاهرة بعد قباني هو Hub Furniture الذي يقدم أذواق مودرن أكثر عن منافسيه.

أسعار الركنة عنده تبدأمن 7 الاف الى عشرون ألف جنيه.

أما بخصوص غرفة النوم، فميزة هذا المعرض هو توفيره لغرف نوم كبيرة الحجم، لمحبي الفراش الوثير الكبير.

السرير عرض ثلاثة أمتار، في غرف “كينج بد” وأسعار الغرف الكبيرة من 22 ألف جنيه الى 56 ألف جنيهز

بينما غرف النوم العادية التي تضم سرير “كوين بيد” عرض 160 سم.

أسعارها تبدأ من 16 ألف الى 46 ألف جنيه.

الأثاث من دمياط