العار على سفارة المغرب في مصر

في منشور لا يكشف سوى العار والفشل في أداء سفارة المغرب في مصر ، كشف عشرات الرحالة عن مدى تخاذل السفارة المغربية ..

ساردين بالتفصيل كيف كانت مئات التجارب السيئة مع السفارة المتعنتة.

هذا المنشور لم يكن الأول ابدا من نوعه.

نقلا عن صفحة عبدالرحمن سعيد :

 

تجربة بخصوص تأشيرة المغرب!
بداية الكلام ملوش علاقة سواء أخدت التأشيرة أو لأ.. أنا بتكلم على المعاملة الغريبة وغير المنطقية هناك من أمام السفارة المغربية بالقاهرة..

مش طبيعى أبدا ان ناس تروح تحجز قبلها بيوم وتتفق مع حد بايت قدام السفارة يحجز الرقم ويكتبه مقابل فلوس وناس تيجى من ٥ و ٦ صباحا عشان يلحقوا دورهم..

مش طبيعى ابدا ابدا فى اى سفارة فى العالم تروح ٨ الصبح تلاقى رقمك ٣٥ وبالحجز بردو اضطرارا وفيه هناك مئات البشر قدام السفارة كأنها مظاهرة وقافلين الشارع.

ولما الشباك يفتح منه للشارع كدا هو شباك واحد شايف فيه موظف واحد وبطئ بطريقة مش عادية وتوصل للشباك بعد ٣ ساعات واقف على رجلك مفيش حتى احترام لادمية او انسانية.

وورقة ارقام وناس متطوعة (بفلوس) لتنظيم الحشد ده وزعيق وخناقات من الناس كأنك واقف فى موقف ميكروباص مش سفارة دولة . انت دافع فلوس عشان تصرفها هناك سياحة!

خلاص قدمت ورقك وعرفت هتستلم امتى نتيجة التأشيرة بإيصال..

تعالى بردو اليوم ده عطل مصالحك كلها ساعتين ونص من ٢ ل ٤ ونص عشان مفيش ألف باء تنظيم وإدارة ونفس الشباك والموظف ينده بأرقام الايصالات عشوائى ..

رقم من الشرق ورقم من الغرب مش بالترتيب ولا حتى اللى اترفضوا ولا تعرف انه اتقبل.

غير لما توصل بعد كفاح للشباك من الزحمة والتجمهر.. لو اتقبلت بتسيب الفلوس وتنتظر تانى فى وسط مناداة أرقام عشوائية تانية عشان تاخد جواز سفرك بالتأشيرة.. بجد ايه ده ؟!

والسفارة على علم ..

بكل اللى بيحصل ده وسيباه ولا موفرة حتى كراسى انتظار للناس ولا منظمة الموضوع وتشرف عليه وتعرف تتعامل مع جمهور ازاى..

منظر سيئ وعشوائى جدا ومعاملة مهينة لينا كجمهور بيقدم ورق عشان ياخد تأشيرة يروح يتفسح بس بالطريقة والمعاملة دى!!

والسفارة المغربية كدا وسلبيتها وعدم نظامها مسيئة لنفسها لأنى لا قريت ولا سمعت ان فيه سفارة تانية فى مصر بالشكل دا ولا حتى سفارات المغرب برا كدا..

بجد والله أنا مصدوم من اللى عايشته بنفسى والكلام ده كنت كاتبه فى وقتها قبل حتى ما اعرف نتيجة التأشيرة ونفسى قفلت من السفر جدا وحسيت الموضوع غلط كدا دى مش طريقة ومش موافق عليها على الاطلاق..

والحمد لله رب العالمين التأشيرة اترفضت وسط عشرات تانيين بدون سبب وطريقة معاملة سيئة لذلك محستش بذرة ضيق أو زعل ونفس الكلام قلته حتى لو كنت خدتها..

ايه الحل تانى لده ؟ غير انى هبعت اكيد شكوى للسفارة على موقعها ونسخة منها للخارجية المغربية.

ملحوظة..

أنا سنى ٣٢ سنة وال hr letter بتاعى من جهة حكومية يعنى ختم نسر وهيئة اقتصادية معروفة دوليا وكشف حساب بنكى معقول جدا عليه حركة منتظمة شبه اسبوعية لمدة ٦ شهور وحجوزات مظبوطة جدا .

بس ده مش السبب لكلامى.. انا بوضح بس الموقف ككل ولو كنت خدتها كانت نفس الاسباب المذكورة تضايق اى حد بصراحة.