كلمة أحمد عز خلال تكريمه في مهرجان القاهرة السينمائي الدولي

حازت كلمة أحمد عز، النجم المصري خلال تكريمه ليلة أمس على أعلى دقائق من التحية والتصفيق دون بحماس وفرحة جماهيرية كبيرة، في المسرح الكبير بدار الأوبرا المصرية حيث فعاليات افتتاح الدورة ٤٥ من مهرجان القاهرة السينمائي الدولي.

أثبت أحمد عز خلال كلمته أنه فنان راقي وعظيم ومبدع وحظت كلماته بصدى واسع جداً حيث قال  :

من حوالي 24 سنه بالظبط خيروني بين إني أكمل شغلي أو أعمل بطولة أول فيلم وعلى غير رغبة أهلي اخترت أخش التمثيل وابتديت أصور، في نص التصوير كدة جه مهرجان القاهرة وكان نفسي أحضره وكان نفسي أكتر تجيلي الدعوة على البيت ومكتوب عليها الفنان أحمد عز

مش لسبب قد إني أقول لـ أبويا وأمي إني اخترت صح، فضلت مستني الدعوة أسبوع و 2 ومفيش دعوة، لحد ما جه يوم المهرجان والدعوة ماجتش فـ روحت سألتهم وكانوا في غاية الكرم معايا وإدوهاني

رجعت البيت خدت دوش وحلقت دقني ولبست وكنت عايز أبقى أبيض واحد في المهرجان وأتصور على الريد كاربت وأبويا وأمي يشوفوني، روحت وعملت نفسي مُثقل بالفن، عديت على أول كاميرا ماحدش عرفني، التانية كذلك وعديت على نايل سينما ونايل دراما والأسرة والطفل مفيش حد عرفني خالص، قولت مش مشكلة

كان نفسي أبقى قاعد في الصفوف الأولى في النص يشوفوني ويبقوا فخورين بيا، جاي من الباب داخل لقيت الراجل بتاع الأمن قالي حضرتك قاعد فوق خالص وورا ، وقعدت فوق خالص
روحت البيت متضايق جدًا، أمي دخلت عليا ودعيتلي ربنا يناولك مرادك، تلف الأيام وأقف دلوقتي على خشبة دار الأوبرا وأتكرم وأخد جايزة اسم صاحبة الجايزة لوحده جايزة (فاتن حمامة) لأ ومين اللي بيكرمني، معالي وزير الثقافة والأستاذ نجم النجوم اللي مجاش زيه حسين فهمي

بس للأسف كل ده بييجي وأبويا وأمي مش موجودين، لو كانوا موجودين أنا متأكد إنهم هيبقوا فخورين بيا بس الحمد لله
الجايزة الكبيرة العظيمة دي مش اجتهاد مني لوحدي، جايزة كل مخرج وزميل وزميلة وعامل وعاملة ولولا ضيق الوقت كنت ذكرتهم اسم اسم ولولاهم ماكنتش هبقى هنا، الجايزة دي حافز للي جاي، أنا حاسس إني ماعملتش أي حاجة

فاكر لحد النهارده قعدتي مع المنتج وائل عبدالله وساندرا نشأت في ملاكي إسكندرية وهما بيفكرولي هيقدموني تاني ازاي، فاكر ده كأنه امبارح، عايز أهدي الجايزة دي لنجم عزيز عليا أوي، قالي في يوم من الأيام “الألتزام والورق أبوك وأمك في الصناعة دي” والنصيحة دي لأي حد جديد ويارب ييجي يوم وكل زمايلي وصحابي يقفوا مكاني ويبقوا أحسن مني

بهدي الجايزة دي للنجم الزعيم عادل إمام