محمود الجبالي يكتب : هل مسلسل لعبة النسيان مقصود به أن يكون كوميدي ؟

في منشور ساخر للصحفي محمود الجبالي، كشف عن فداحة أخطاء الحلقة الأولى من مسلسل لعبة النسيان .

وكتب التالي :

دينا الشربيني عاملة مسلسل كوميدي اتنبأ له إنه ينافس في رمضان السنة دي.

أولاً هي خلفت طفل نازل من بطنها عنده شهرين.. وده علشان كانت بتغيه كويس وهو في بطنها

ثانياً المحامي اللي المفروض انها بتخون جوزها معاه في المسلسل خد رصاصتين في قلبه ومامتش الا لما قتل جوزها..

ده حتى موقعش على الارض.. لازم يقتل جوزها علشان الموقف يتصعب والاتنين يموتوا القصة كلها تبقى عند دينا اللي فاقدة الذاكرة وتفضل غامضة لأخر حلقة.

ثالثا بقى أحمد صفوت جوز دينا مات إزاي؟ بعد ما ضرب المحامي رصاصتين في قلبه ومامتش .

راح المحامي ماسك ازازة ضربه بيها في وشه.. هو ده اللي ظهر في الفيديو..

إنما اللي اتقال في المسلسل إنه مات من إصابتين ضربة إزازة مش فاهم هو اتضرب بيها في وشه ولا المحامي كسر الازازة وعمله بيها تعويرة في دماغه.. اقلب يا عم محدش هيدقق !

رابعاً بقى وده الأهم.. دينا الشربيني حاولت تنتحر..

سيبك من السبب اللي محدش لسه يعرفه بس هي نطت من الدور الأول اللي هو اتنين متر نزلت على نجيلة اللي هي طينة أصلاً فقدت الذاكرة..

مش مهم كل ده.. اللي فافعني هي دماغها اتفحت ازاي من الطينة؟؟ ده لو واقعة من الدور الرابع دماغها مش هتتفتح

مستنين باقي المسلسلات الكوميدية تتعرض علشان نقارن ونشوف هنتابع ايه

مسلسل لعبة النسيان