محمود الجبالي يكتب : قواعد التسلية الأربعون !
محمود الجبالي يكتب :
القعدة في البيت مملة وهتطول شوية علشان كده ممكن أشارككم بعض المقترحات للإستفادة من الوقت ده بدل ما تقعد زهقان.. ممكن تضيع اليوم ازاي
قواعد التسلية الأربعون
1- ادلق مية بشكل عشوائي من بلكونة بيتكم في الشارع
2- فصص بسلة
3- اغسل المواعين
4- انزل لم المية اللي دلقتها في الشارع
5- امسك دبانة صاحية واحبسها في كيس وراقبها هتتصرف ازاي
6- هات عيل صغير (اي عيل) واقعد خوفه لغاية ما يعيط
7- هات كتاب قريته قبل كده واقطع صفحات من النص بشكل عشوائي واقراه وحاول تفتكر ايه اللي كان مكتوب في الصفحات المقطوعة
8- حط مية ساقعة على مية سخنة واضربهم في الخلاط وبعدين حطهم في الفريزر
9- ادخل على فيزيتا واكتب كومنتات وحشة لكام دكتور
10- اقف في البلكونة وصرخ وادخل بسرعة جوا البيت تاني
11- بعد 5 ثواني اخرج بص زيك زي الناس واسألهم مين اللي بيصرخ
12- إلزق صفحات الكتاب اللي قطعتها
13- انفخ بلالين وعلقها في السقف
14- شغل مروحة السقف واقفلها وحاول تتوقع وهي لسه بتلف اني ريشة فيهم اللي هتقف فوف دماغك
15- اضرب الودع.. بس مش ضرب مبرح
مزيد من الأفكار
16- لغبط قنوات الريسيفر
17- هات كيس مكرونة سباجتي واقسمه بالنص بينك وبين اي حد وافضلوا حاربوا بعض.. واللي المكرونة بتاعته تخلص الاول وتتكسر يخسر
18- طبطب على الودع اللي انت ضربته من شوية
19- انزل اشتري كتاب بدل اللي انت قطعت منه صفحات وشوهته
20- رستر الراوتر
21- ادخل هات المية اللي حطتها في الفريزر وبقت تلج وسيبها تسيح
22- رتب قنوات الريسيفر اللي لغبطتها من شوية
23- اتصل بواحد صاحبك واتكلم معاه عادي وفجأة قوله وانت مخضوض “ايه ده؟.. هتصل بيك تاني” واقفل في وشه
24- اتصل بخدمة عملا اي شركة نت او اتصالات واشتكي من ان النت بطئ او الشبكة وحشة وقدم شكوى
25- عد بلاطات أرضية البيت كله.. وهتتلغبط برضه
26- اقعد كلم نفسك وشوف هترد عليك ولا لا
27- ارجع للدبانة اللي حابسها في الكيس ودخلها شوية هوا علشان متموتش وسيبها محبوسة
28- هات مسامير صغيرة واقعد نشن على البلالين اللي علقتها في السقف
29- المية اللي كانت تلج وساحت حطها في الفريزر تاني
30- كلم صاحبك تاني وقوله “معلش السلحفاة كانت بتنادي عليا”.. وفهمه ان الفترة اللي قعدت فيها في البيت اتعلمت فيها لغة الحيوانات
أفكار محمود لا تنتهي
31- هات مية معدنية وافصل المعدن منها
32- هات صواريخ وفرقعها على السلم وادخل شقتك بسرعة واخرج بعدها اشتم اللي بيفرقعها وزعق للجيران
33- هات كوريك عربية وحطه تحت الانترية وارفعه
34- هات علب تونة قطع وفتتها
35- اقنع نفسك ان في عصابة في البيت واستخبى في الدولاب ساعتين
36- بهدل المواعين اللي غسلتها وخد البسلة اللي فصصتها وإلعب بيها بلي
37- هات شيتوس بالشطة وشيتوس تاني بالجبنة وفضيهم على بعض وقلبهم وبعدين رجع اللي بالجبنة في كيس الجبنة واللي بالشطة في كيس الشطة.. من غير ما تدوق
38- حاول تقرص نملة بدون ما تموتها
39- اخرط ملوخية وحطها على شعرك نص ساعة وشوف لونه هيبقى أخضر ولا لا
40- أكيد تعبت.. ادخل نام
محمود الجبالي
